Image - Cacao Pod Vessel - K6706 © Justin Kerr FAMSI © 2001:
David Bolles
 

Post Conquest Mayan Literature

  u uudz katunoob I
 
Buluc Ahau Katun
 
d001 Yiban Caan u kaba
ti lakin yan u codz
Ich Caan Ziho u hedz katun ti Buluc Ahau Katun
cumlahom ti poop, cumlahom ti dzam
ti ualac u than, ti ualac yahaulil
d005 Yaxal Chac u uich ti yahaulil ti caanal
etlahom caanal ual, etlahom caanal udzub
pecnom pax, pecnom zoot Ah Bolon Yocte
tu kin yan yax cutz
tu kin yan zulim chan
d010 tu kin yan Chakan Putun
uiilnom che, uiilnom tunich ah zatal uiil
ca tali yemel ichil Buluc Ahau Katun
okban caan
ox koch u uah katun
d015 xotom u cal Yaxal Chuen
uecom ix kanulta ti baalcah
ti yan banban ah kayili yetel ix kayili
mamac ma ah kay
ah kaynom pal, ah kaynom nuc xib, ah kaynom ix nuc
d020 ah kaynom tancelem, ah kaynom ix lokbayen
ti yulel a uidzineex, a zucuneex
ti yulel u hel a uex, u hel a nok
u zacil a buc, u zacil a uex
xoloob dzul, ah mexoob
d025 Ich Caan Ziho u hedz katun, u hedz luum
he ix yah kine cuxul ku, hahal ku
lay bin kultabac tu hun yuklah ti baalcah
ti yemel u hoyaan tepal
ix ma yum, ix ma na
d030 balam u pol, ceh u uinicil hoyaan cah
ti tali u chun u ox kaz tepali Ich Caan Ziho lae
lay u cuch Buluc Ahau Katun lae
 
 
Bolon Ahau Katun
 
d040 Pacab u kaba
 
 
Uucil Yaab Nal u hedz katun ti Bolon Ahau Katun
tu kin yan okliztuba
d045 bin yalab halach uinicil ti
ma lay chen u uacunahuba ti batabil yetel ti ah kinil
bay ix ti nacomale
ti ualac yahaulil tu poop, tu dzam
hun pay u yol
d050 ti yemel tab ti ah bolon ahau lae
zip u than, zip u chi, zip u katun ti yahauliloob
ah bolon kin, ah bolon dzam
tu tepal ah uuc chapat kin
u chamal katun
d055 ca tali yemel tabe
ek imix uah u uah katun ti Bolon Ahau Katun
Ca Kinchil Zac Uac Nal u uich ti yahaulil
ti okol ha, ti okol uah, u uah katun
ti uchom hak oltzilil katun
d060 u uiil katun, u yukul katun, u ximbal katun
u puczikal hach dzedzili than u kati
tu yah tanlah kul, u halach uinicil ah bolon ahau lae
ah bolon tepal kin
u cool akab katun
d065 lay bin u dzauba ti holcan thanil u dzoc yahaulil
ti yan banban kuleli
yan u uah, yan u yaal
tu dzoc hayaan u poop tu tzic
ti yan banban cal pachi
d070 lay u than Ah Bolon Ahau Katun lae
 
 
Uucil Ahau Katun
 
d080 Kancaba u kaba
 
Mayapan u hedz katun ti Uuc Ahau Katun
Ek Chuuah u uich ti yahaulil tu poop, tu dzam
Amayte Kauil u uich tu caanil ti yahaulil
d085 uchic u hoppol u dzocol u toppol ix bolon yol nicte,
      ix dzibaan yol nicte
nicte uah u uah, nicte ha u yaal
dzamlic u halach uinicil baalcah
dzamlic ah kin, dzamlic ah bobat
zat u yol tumenel nicte lae
d090 mamac bin u lohuba tu hahal caan ti yah ualkahi
ti yan u uich yetel u puczikal
hunac tzuc ti cab
ppencech cal pach uchomi
ti pulaan yoc tulacali
d095 lay u tucul ti kin, lay u tucul ti akab
u keban kin, u keban akab
u munal u puczikal halach uinicoob yetel ah bobatoob
ti yetzic u che, ti yetzic u tunich ix ma na, ix ma yumi
chaanuba xaxak yoc uinicil Ah Uuc Ahau Katun
d100 hach coil than u than, coil ximbal u ximbal
Ich Caan Ziho uchom tu hoppol tu pach
yuklahom ti cab, yuklahom baalcah tulacal
bolon dzacab uah u uah, bolon dzacab ha u yaal
ca tali yemel u uah ix kuk, u uah ix yaxum,
      yaal ix kuk, yaal ix yaxum
d105 uaan ti dzadz, uaan ti buluxe
yutzil u cichpamil cħuplal, cichpamhom ma cichpam
bin ix ahaanac, ma ahom ma ahco
ti tali u kinil heuac ti yan uuc kin tepali
uazut tepali, homol tepal, uuc kinili uil u tepale
d110 yanoob u uinicilobe; he u uinicilobe, ix tolil och
ah chanbel pakben cab bin tepalnacobi
bin u kohi u keulel hun pay balam
u koh ceh, thul u uinicil
cheehom u uich tu cab, tu peten
d115 tu tepal, tu yahaulil ah mahan poop, ah mahan dzam
ah tem poop, ah tem dzam, ah mahan tepal
lay u caah u than
bin u mucchekte u halach uinicil cah, u zidzil ahaulil
lay bin yahaulil te Uuc Ahau Katun,
      tu haabil 1896 bin lubuc Uuc Ahau
 
 
Hoil Ahau Katun
 
d120 Kupul u kaba
ti nohol yan u codz
 
Zodzil u hedz katun ti Ho Ahau Katun
ppuzlahom u uich yahaulil cabobi
d125 mochahom u uich yahaulil cabobi
hun tzol yol mazuyben palal
bin yocezuba tu cħamacil u yocmaloob cab
u xolobaloob cahi
u balic u tucul u halach uinicil
d130 mamac bin u yaalcuntic yol yahaulil cabobi
cuculnac u ximbal tu hunal
bin mucchahac ah tubul uah, ah tubul ha
ti u chibaltamba tolil ochi u zidziloob ahaulil
ox koch u uah katun lae
d135 nicteil uah u uah, nicteil ha u yaal
ti yuchul cacatuli ximbali
ppencech cal pach uchomi
ox uen kaz u uiniciloob
yuklah uil ti cab
d140 he u katun lae
ma nach yan u uah
hun pach kaxil, hun pach buktunil
thul caan chacil yaal, tholinthol yaal
yanhom uil uah hun pach kaxil, hun pach buktunil
d145 ichil u cuch haab chacmitan uiih
heuac yanhom hoyaan bataboob lay ti Ho Ahau lae
tu yulel u yanal thanil Ich Caan Ziho u beeltabal
      yetel u yanal uinic
ti ix u chibaltamba kokobi yetel balami
ti ix u chibaltamba tolil ochi
d150 dzocaan u than hoyaan bataboob, u bataboob Ho Ahau Katun
u mehenoob ah tzootz, ah matan yolobi
ix ma mek ix hihidz be u uiniciloob
      yah tanlahul u bel Ah Ho Ahau Katun
ah mahan poop, ah mahan dzam
u mehen yal ix tibil beob
d155 kaxaan u uichoob, ma tan yilaboob
yanil tah poop, yanil tah dzam cumlicoob
dzocom u than
ca likom u cal balam
ca likom u cal kokob yetel ahau can tu dzoc Ho Ahau Katun
d160 tu dzoc u pul tan u koy Ah Itza, u zidzil ahaulil
bin u chibal u yumil alakbil peki
ma nach yan u kin u ualak yokol
      yetel u mehen ah mab na, ah mab yum
zauin tu poop, zauin tu dzam
hun pay pucħ tun u dzoc zidzil
d165 ti ix yemel cal cucup
hoyic u yich u tepal kulel peten
ca bin uluc u dza olal ti hahal ku
heklay u cuch lae, maya cimlal
u dzoc ti bin, ti ix ma xan
d170 uchom u choco u olal tolil och
tu haabil 1921 bin lukuc Ho Ahau Katun
 
 
Oxil Ahau Katun
 
d180 Ah Na Pot Xiu u kaba
 
 
Zuyua u hedz katun ti Ox Ahau Katun
licil u than yetel u bel
d185 haylic u keulel can, haylic u keulel balam ti Ich Caan Ziho
ti ox kin u zut ekel nok caanal
Zuyua uchi yahaulil ti Ox Ahau Katun lae
Yax Cocay mut u uich ti yahaulil
oxil uah u uah
d190 zac patay haabil
chen ik bin manaci
heuac pacatnom tu caanil
tu tzicil tu tepal buluc cħabtan
pacatnom yahaulil cabobi tu poop, tu dzam
d195 xotom u cal ah tem poop, ah tem dzam
u balamil cab chac bolay, chac bob, yetel zac bob
num yol ualac yacan tu pach yahaulil cab
okom yol yaxcach, okom yol bulcum tu hol can be
pacatnom buluc cħabtan
d200 otzilhomoob chac uen co, zac uen co
ah cħin cot, ah cħin pacab, ah mab yum, ah mab na
tu dzoc zidzil uchom mactzil ti caan
ca bin uluc ua ma xan
Hunab Ku yohel
d205 uchom yokol Ich Caan Ziho; yuklah ti baalcah
bin uchebal ppuluxhal, uecdzahom cab, uecdzahom peten
chochpahom u uich, chochpahom u kab, chochpahom yoc
ua pacabal cah, ua maya cimlal, ua haycabil
ca bin dzococ zidzil lae
d210 mactzil ti c’alahe
lay bin uchuc u yahaulil ti Ox Ahau Katun lae
he ix ah tem poop, ah tem dzam, ah mahan poop, ah mahan dzam
bin u xeic lay u lukahe tu chie
ti u hoyabal u cali ah ox kin tepali, ah ox kin dzami
d215 ti uaan ti be zanzamal
hach cħahuc, hach ci ca u lukahe, heuac ya bin u xeic
ah zidzil, ah cotz, ah hoc muc tza, ah mahan nail
okom yaxcach, okom bulcum tu hol can be
bin yokte u dzam, yokte u poop ah ma yohel u yum, ah ma yohel u na
d220 lay Ox Ahau Katun lae
yanal u uich yetel u than yetel u bel ah pauahtun lae
lay uacunah ah kin cħel dzilame
uchci u tal dzidzil al, dzidzil mehen
yan cochom; lay u cħa u tunil u than dzilam
d225 lay u yalah Chilam Balam utial u nudz tun u dzoczic u than
tan u hidzil dzidzil al, dzidzil mehen chactun numya
tumenel tu haabil yahaulil zidzil lae
hach ya bin dzocbal ua haycabil
u dzoc u than ah kin chilam lae
ca u tzolah u cuch Ox Ahau Katun lae
 
 
Hunil Ahau Katun
 
d230 Dzon Ceh u kaba
 
 
Emal u hedz katun ti Hun Ahau Katun
emom tabi, emom zumi
d235 tu kin yan ca emom ix puc yol ha, ix ual icim
ox kaz u ta, ox kaz u ton
ox kaz yol ti yahaulil, ox kaz u tucul ti yahaulil
bin yilab cuxaan ua bay lae kazaan ahauobi
ti Hun Ahau Katun Amayte Kauil u uich ti yahaulil
d240 pecnom peteni, pecnom baalcahi
pecnom tan chumuc cab tu pol peten Ich Caan Ziho
ti yan yokol ah tzootzi, ah matani
ah mahan koh, ah mahan poop, ah mahan dzam ti yahaulil
ti u yuchul cuchlumtamba
d245 bin dzocebal u zidzil yahaulil
u mehen ah cħin yal ix titibe
okom yaxcach, okom bulcum
bin copahom baalcahi, bin u cocouba cabi; ca bin paxac baalcahi
u tax tali to, u uac tali to
d250 ca bin dzemac tumenel u yaya than katun
hun uay, hun kin u tepal ah tem poop, ah tem dzam
ti u pul than chac uen co, zac uen co
bay uil much cochome ox yel ah tok
lay u dzoc zidzil ti Hun Ahau Katun lae
d255 zutnom ah cuchlum yidzinoob
yuklah cab u than
ti tali u haabil dzidzil al, dzidzil mehen, mucuy al, mucuy mehen
okom yol ti yahaulil
ti ulom u yanal thani tu cuch Hun Ahau Katun lae
d260 tu than ah kin Chilam Balam
ca tu tzolah u cuch katun lae, tu than lae, tu kin lae
 
 
Lahcabil Ahau Katun
 
d270 Ahau Tuyu u kaba
ti chikin yan u codz
 
Zaclactun Mayapan u hedz katun ti Lahca Ahau Katun
Yaxal Chuen u uich ti yahaulil tu caanil
d275 ti uchom hunac ah menil yetel hunac ah idzatil
ti uchom hunac ah ezil
okom yan tu caanil ah kin
cumlahom tu dzam, tu poop balam kokob
uac dzac u tepali
d280 ti uchom cici batabili, cici ahaulili
yetel cici uinicili, cici al mehenili
yuklahom ti cab, yuklahom ti baalcah
cuchpachhom ah holil ochi
bin u ppatab u mahan poop, u mahan dzam
d285 ca xic nak tancab, nak pocche
ci oltzilhom u uinicil baalcah
manaan cab cohi, manaan cħamaci
manaan zabini utial u dzudzic u kikel uinicil
manaan ah cocintahil ahaulili, manaan ah cocinyahil tepali
d290 mahanbil edzbil
ma uchom ah mahan kohi
lay u cuch Lahca Ahau Katun
yan u tepal, yan yahaulil, yan u tzic
heuac manaan u uah, pacabal u dzoc, ua maya cimlal
d295 tu dzoc u yanhal u max kin, u max katun
pucħ tun bin u dzoc zidzil
uacte haab utzi, uacte haab lobi
ca utzac tu caten yambil
heuac tan ppeleb xoteb katun bin tohcintic, bin chaanaci
d300 u than hun kul ahaulil
bin utzac cahi
manaan cab cohi, manaan cħamaci
manaan zabini ti chibali
hodzom u yicħac balam, hodzom u yicħac cohi
d305 cuxlahom cabi, cuxlahom peteni
tu yoxlahun uudz katun Lahca Ahau Katun uale
lay u bel yetel u than ca u tzolah noh ah kin Chilam Balam
bin uchuc ti u numil cħibaloob, uchemale ci u than
ca yalah chilam uchie
 
 
Lahun Ahau Katun
 
d310 Xul Kum Chan u kaba
 
 
Lahun Chable u hedz katun ti Lahun Ahau Katun
Lahun Chan u uich ti yahaulil
d315 cit bolon uah u uich tu caanil,
      cit bolon uah tu kin u kax eb chei
canlot pathom be ti caan
zac patay haabil yani
manaan u uah
ox yetel cup u uah yetel yaal
d320 kaxaan u uich, kaxaan yahaulil tu caanil
zataan halach uinicoob yetel u cuchteeloob
uiih u cuch
okaan u keban baalcahi
pecnom pax, pecnom zoot, pecnom cantul bacabi
d325 ti u lachbal u pach u yaxcheil cabi
ti ix u colabal u yekil cal cucup
u hahal than u codz poop katune
ti ualac u xihul baalcahe
lay u cuch Lahun Ahau Katun lae
d330 okom olal yani ti yahaulil tu cuch haab lae
 
 
Uaxac Ahau Katun
 
d340 Tucuch u kaba
 
Uaxac Ahau Katun culhi ca uchi pacabal Mayapan
Lahun Chable u hedz katun ti Uaxac Ahau Katun
Amayte Kauil u uich ti yahaulil
d345 ti okol uah, ti okol ha
cit bolon uah u uich ti yahaulil tu caanil
tokil uah u uah, tokil ha u yaal
holcan u can
mamac u tzic, tibezah u caah tu uah, tu yaal
d350 otzilhom chakan, otzilhom uitz
bin tzaclabac tumen tulacal
manaan u yaal chakani, manaan u yaal uitzi
yuklah ti cab, yuklah ti peten
tuzinil yan bacabi
d355 ti emom Kinich Kak Moo tu tepali
ti emom ix u yanal cab
ti yuchul cħa toh tumen ah cħin cot, ah cħin pacab
tumen ah mab na, ah mab yum
u koch yahaulil tu chi cħeen yetel yahaulil tu chi kaknab
d360 ah xaman cab yan bacab
ca bin tac u kochi uil tulacaloob
lic yahauliloob cochome
emom halal, emom chimal yokol paxebaloob
ah hoyaan tepaloob ah tem poop, ah tem dzam
d365 u mehenobe u hoyaan Ah Itza yaloob ix hihidzbe
koch u than katun lae
pucħ tun yani, pacabal u dzoc tumen ah zidzil ahaulili
bay chacanil bin ulebal ah Kinich Kak Moo
ichil Uaxac Ahau Katun uale
d370 pacabal bin ocbal ah Kinich Kak Moo
ti tali haulahom caan, noclahom luum
ti uchom haulahom caane
zipci bin chacanacoob u halach uiniciloob cahe
bin ix thilac u caloob yahaulil cabi
d375 mucchahom tumen ah tem poop, ah tem dzam
he ix oc ti nocpahom luume ah chincunabaloob, ah mabalcunabaloob
tu dzoc piz uinicoob
okom yaxcach, okom bulcum tu hol can be u yokticoob
lay u than Uaxac Ahau Katun lae
d380 heklay uchci pacabal Mayapan lae
kaz u than katun
bay bin uchci u than ca bin zutnac tu caten
tu than ah kin Chilam Balam
tu dzibtah u uoohil u uich katun Uaxac Ahau Katun lae
 
 
Uacil Ahau Katun
 
d390 Cit Couat Chumayel u kaba
ti xaman yan u codz
 
Uucil Yaab Nal u hedz katun ti Uac Ahau Katun
Kinich Kak Moo u uich ti yahaulil tu caanil
d395 chic u uich, co u than
ti uchom okliztuba
ti u uacunticuba ah tem poop, ah tem dzam
ti uchom okliztuba tu caanil, tu yekil tu zihnalil
bin u tuzub homol tza, hoc muc tza
d400 u uinicil yah tanlahul u bel Uac Ahau Katun
uiilnom che, uiilnom tunich
chacmitan uiih u cuch
cimom culaan tu poop, culaan tu dzam
xotom u cal u halach uinicil cahi
d405 bin culacoob nak cot, nak tancab
tumen ah maciltah lelobi tumen ppiz u caah
lay u caah u than; manaan u xul tu dzi yol
ti u hokol ich luumil che, ich luumil tunich
ti uchom oxten cochomi u chacil cupil uah, oxil uah
d410 chacmitan uiih u cuch
pacabal uchomi
lay u cuch Uac Ahau Katun lae
ox kaz u tepal
oxtul ah tem dzam, ah tem poop bin yanaci tu canpiz tun
d415 u pactic u pach
ti yan tepali, ti yan ahaulili
tu dzoce ma ontkin bin haulac luume, ca noclac tu caten
ma manom kin tu thital u cal ah tem poop, ah tem dzamobi
ma ix baal pathom ti yahaulil, bacac ix ci yoloob
d420 lay u than Uac Ahau Katun lae
heklay u uich yetel u uoohil Ah Uac Ahau Katun lae
 
 
Canil Ahau Katun
 
d440 Ul Uac Chan u kaba
 
Uucil Yaab Nal u hedz katun ti Can Ahau Katun
uucten u yail tu chi cħeen
Uuc Chuuah Nal u uich ti nohol
d445 yahez u ne zaztamba
ah bac ocol u uich, cimen u uich
yokol u uah, yokol u yaal
u balic u tzicic tu hunal; u zimciloob u than tu hunal
u kat tzicil, ma yolah tzicil
d450 bay u bel yahaulil cabi
yah tanlahul u bel Can Ahau Katun lae
coc ach tu uah, coc ach tu yaal
bin dzococ ti tu tzicilil
hun pay u yol
d455 ma tan u tzicil; hayli ci tu cal u tzicil tu hunal
manaan u yol u tzicil
chikintanhom u poop, u dzam
maya cimil u cuch
ti tali zatay batabili
d460 mucchahom u halach uinicil cahi
xe kik u cuch katun
tu kin yanhom zac a uex, zac a nok
ix chambel uah u uah
ulom kuk, ulom yaxum tu kab kaxte
d465 ulom ah kayum mut
ulom tzimin tepoy
mucuc patan tu chi cħeen
tancoch katun utzi, tancoch ix ma utzi xani
lay bin tepalnac ah chicum ek tu caanil
d470 yax aclam, yax cocay mute, ah ahzah
maixmac ahom tumen mute
cħencħen u xicin ti babal tulacale
lay u uich Can Ahau Katun lae
uchci maya cimlal, oc nail kuchil
d475 bay bin pahbal tu uudz tu caten, ca bin zutnac u uudz katun
ti cultal tu cuch haabil tu yahaulil
bay yalci ah kin Chilam Balam
tu cuch katun can ahau uale
 
 
Cabil Ahau Katun
 
d480 Nauat u kaba
 
 
Zaciyapan u hedz katun ti Cabil Ahau Katun
Zaclactun, may cu Mayapan
d485 okliztuba katun
tu kin yan emom zum, emom zaban, emom ya
maya cimlal, ox multun tzekil, zac patay haabil
lay u cuch, lay u chaan katun ti Ah Cabil Ahau Katun lae
kaxaan u uich buluc cħabtan
d490 ca tali, ca zihi hun yoppol ik
oxil uah u uah, cupil uah u uah
tancoch u cuch haabil utz; yanil u uah, yanil u yaal
yetel u tepal yetel u yahaulil
tancoch ix chactun numya
d495 yanil u dzam, yanil u poop
tu tzic tu uah, tu tzic tu yaal ti yahaulil cabi
ti yan u chek oc u yanal cabi
lay u katunil uchci u taloob
      u ah kiniloob zac uinicoob, ah mexoob
uchci yulel a yumoob, a zucunoob
d500 bay yalci tiob Ah Num Itzaob tumen ah kin Chilam Balam
bin a balinteex
bin a bucinteex u bucoob, bin a ppocinteex u ppocoob
bin a thaninteex u thanoob
heuac he u ppolmale, bateel ppolmal
d505 tu kinil u toppol nicte, hun tuliz nicte
mamac ma lubomi
tu kin yan ix dzibaan yol nicte
ca bin ulucoob u nicte katun lae tu Cabil Ahau Katun uale
u tan ca mol boxtic u katunil Buluc Ahau uale
d510 lay culic Ah Cabil Ahau Katun cu cultal ti hunil Cauac lae
 
 
Oxlahun Ahau Katun
 
d520 Ah Kin Chi u kaba
 
Kinchil Coba u hedz katun ti Oxlahun Ahau Katun
d525 may cu Mayapan
lay bin yalic u than, lay yan u uich
heklay u katun lae
Itzam Na, Itzam Tzab, Chac Zabin u uich ti yahaulil
chacmitan uiih u cuch
d530 cupil uah u uah, oxil uah u uah hote haab
cimi cup yetel ox oxte haab
ca tac zakil haabil
zakil yan u uah, zakil yan ix yaal lahun dzacab, oxlahun dzacab
zakil yan u cuch
d535 yan u tzic tu uah, yan u tzic ti yaal
etlahom ual, etlahom udzub yahaulil cabi
tumeneloob caanal ual, caanal udzub yahaulil cabi
Yaxal Chac u uich tu caanal, ti yekil
tu kinil yulel ix ma chucbeni
d540 chibon kin, chibon :U:
zatay batabili, zatay ah kinobi tumen ix ma chucbeni
zatay halach uinicobi, zatay ahaulili, zatay ah bobatobi
zatay ah kinobi, zatay ah naatobi tumen dzibaan yol nicte
banban coil, banban cal pach bin chunpahaci; zatay batabil yani
d545 ti yocol ti yahaulil ah bac ocoli
u balic u tzicic tu hunal
bin u mucchekte u halach uinicil cah
ich luumil che, ich luumil tunich
u coil al, u coil mehen
d550 ah cħin cot, ah cħin pacab
ma yohel u yum u mehenoob ah bac ocoli
ix ma chuc uah u cuch katun
he ix u uinicilobe Ah Bolon Yocteob
ah ca kin poop, ah ca kin dzam
d555 ix ma na, ix ma yum
u coil al, u coil mehen
chouac u chiob, com u chiob
chian u uich u kiniloob, chian u uich yuiloob
bin tac thanac balam, bin ix tac thanac cehi
d560 tu kamah u che tamuk uil yacan u macul cab
lay uazut cimile, chetun cimile
ma hunppeli u cuch maya cimil, ca bin dzococ chacmitan uiihe
lay u balma u cuch katun Oxlahun Ahau lae
tu uucpiz Bolon Ahau u hidzil ti oxlahun katun lae
d565 bin u lakinte Buluc Ahau Katun tu mul ahauliloob
latulah tu uacppel u haabil Bolon Ahau u ppaticoob catuloob lae
Oxlahun Ahau yetel Bolon Ahau lae
bay uchic u yalic ah kin Chilam Balam lae
tu haabil 1824 ca bin dzococ Oxlahun Ahau

Previous Page  |  Table of Contents  |  Next Page

Main Index

Return to top of page